زيارة قصيرة

النهار دا وفي زيارة قصيرة مؤثرة جداً، أحمد جاب لمزوق لوحة خشب هدية مكتوب عليها "الله" وطلب منّي أنطقها بصوت عالِ وسمعت كلامه، سألني: "أخدتي بالك انك ماحرّكتيش شفايفك وانتِ بتنطقيها؟

لفظ الجلالة الله بيطلع من جوانا مش بنحرّك فيه شفايفنا بالظبط زي الإبتسامة اللي انتِ بتطلعيها في صورك يا ندى!"

أنا بأحب أحمد وبأحب هدية أحمد.

17-11-2012

طقوس

كل يوم أصحى بدري جدا وفي أقل من عشر ثواني اتأكد ان:
أمي صحيت قبلي وبتعمل لنا فطار حلو، وان سارة بعتت مسدج بأخبار إمبارح، وان توفيق ثاقب على قيد الحياة، وان سليم ومي وشريف لسة بيتويتوا كتير حتى لو خرا، وان الراديو سليم وفي مكانه، وان التيليفون فيه شحن واللابتوب مش ناسياه في الشحن، وان معايا إيجار مرزوق للشهر ده، وان إسرائيل لسة سايبلنا دهب، وان خطوط الوصل بيني وبين ساكني روحي متينة،
وبعدها أقرر ابدأ اليوم إزاي أو أنام تاني بعد مااتطمنت عادي جدا... 

بأتخيل لو..

لو في حقنة ألم، تسحب الألم من الجسم وتفضّي في جسم تاني أقوى أو في أي داهية بعيد
لو كتبت لي كل كلام ماعرفتش تقوله في جواب حتى لو مابعتّوش
لو كل حلم حلمته بيك كنت نايم انت في نفس اللحظة وشفته معايا
لو حد اخترع علاج حقيقي للسرطان
لو أقدر أحضن كل حد عنده مشاكل "عضوية" في القلب بعمق
لو كل الناس تعرف تحبني ببساطة سليم ونجيب
لو كنت أقدر أسجل كل فكرة جاتلي طول الطريق من الزمالك لدهب
لو كنت سَكِّنت كل حد قابلته -قبل ما أقابله- روحي، زي كريم ومي
لو كنت سمعت الكلام القبيح اللي حصل في مخي لحظة ما عرفت كل حاجة بالصدفة
لو القاهرة كانت بس أفضى شوية .. لو كانت حبّتني زي ما اسكندرية بتحضنّي
لو ألمانيا قريبة قد ما بتجيلي كل كام يوم في الحلم
لو كنتي سمعتيني بقلبك قبل ما تاخدي قرار بالبُعد
لو كلنا ماعملناش أي حاجة في الدنيا غير بس ذاكرنا "ريكي" وصدقناه
لو جولي تعرف علّمتني وهي ماشية قد ايه
لو كانت قابلت لؤي وياسمين ناجي وأحمد وبيخرجوا ويخلّوا بالهم من بعض هناك
لو كل واحد ياخد ريحته معاه وهو ماشي مايسبهاش فيّ
لو كل مغني/مغنية قلّد/ت ضحكة سيد مكاوي أو شاب خالد وهما بيغنّوا
لو نتعامل بالصلاة ع النبي بدل الفلوس
لو في أي حاجة سعيدة في الدنيا عرفت تمسح خط حزن 5 أيام محمد محمود من صدري
لو وفّرنا 10 ثواني من كل يوم نبص فيهم لفوق على السما

وبأتخيل لو انك موجود وبتقرا كل تخيل أنا كتبته فوق...