جردل

قلت له كلام بايخ يحمل معاني اني مش كويسة ومش مسامحة، فكان الرد: مقابلته صدفة بعدها بساعتين بيتمشى في نفس الشارع اللي أنا قاعدة فيه على قهوة في الزمالك، وعيني تيجي في عنيه، بس ما شافني... في----               الخلفية صوت أرمن/أرمل طفلة القهوة: أنتِ بتعيّطي؟ هيّ كمان هتمشي؟ طب أنتِ هتيجي تاني؟ راجعة؟!----

أنا جردل متحرك، بيدلق كل الكلام والأحاسيس والمشاعر .. ميعرفش يخبّي .. ميعرفش يخلّي .. يموت!
شهاب قال لي إني جردل حلو وقال لي إستمري! "انتِ مشاعر حزن قيّم أحسن من فرحة خيبانة"
وفي نفس القاعدة شهاب برضه قال "انتِ فاضحة نفسك على تويتر وبتقولي كل حاجة صريحة جدا مش محتاج أسألك!"

لمّا حتة في جسمك توجعك، صوابع ايديك تفضل تتحسس مكان الألم، حتى لو ده عمليا ممكن يزوّد الألم فهو إحساس مريح..
بس ده لو المكان في جلدك، وشك، شعرك، مكان ظاهر يعني..
ببقى عايزة أجيب العدّة "مقص، سكينة، منشار،..." وأقطع وأحفر وأدخل صوابعي جوه وأطبطب على قلبي.

كنت بأسمع ناس تقول: لمّا فترة الألم تزيد بتتعود عليه، بيبقى جزء منك وبتلاقي طريقة تتعامل بيها معاه وتتعايشا في سلام. الكلام ده هري! هري عظيم!

وإحساس فأر التجارب ده لطيف في مرحلة، لكن 3 سنين مش مرحلة!! ده عُمر!
طب ليه مفيش دكتور زي "هاوس" في الحقيقة يحل اللغز ونخلص؟! مش شرط يبقى أمور زيه، بيكفيني انه بس يحل اللغز بس! حتى لو مش هنعرف وقتها نعلاجه بس طب نبقى فهمناه!

عاوزة نوسة تضحك ومتبطّلش أبداً، علشان بس أعرف أفضل أتنفس بإنتظام...

في وسط كلامنا حكى لي مخلوف القصة دي: "لو عندك ف البيت كرسي، كرسي عادي يعني مش متعلّقة بيه أوي، وساعات بيخبطك في صباعك الصغير، الكرسي ده إتباع يبقى حصل ايه؟
هيبقى في كتلة ما برغم انك مش حباها سابت مكانها، لازم هتحسي بفراغها، انتِ حاسة دلوقت فراغها!"



كل يوم بأفضل أقرا في السرير لحد ما أنام فأصحى ألاقي الكتاب وجنبه نضارات النظر ع المخدة، في يوم بأصحى مالاقيش النضارات وبعد رحلة بحث استمرت عدة أيام بلا فائدة بألاقي النضارات فجأة في مكانهم!!
- عادي الملايكة بتلعب معاكي
- بس ده لعب مُضر، الصداع ماسبني ولا ساعة
- بصراحة لو كنت ملاك أكيد كنت هاعمل معاكي كده!
(ياريتك كنت ملاك .. وجع الصداع أرحم كتير من وجع قلب إنسانياتك)


- لمّا دخلتي أوضتي كنت نايم في كورنر ضلمة وشفت كل حاجة
- علشان كده عزمت عليّ بالقهوة؟
- علشان كده .. علشان لمّا جيتي ومشيتي مخطفتيش حُضن، فقلت اعزم بالقهوة وأخطف أنا الحضن.
                       ----في الخلفية بصوت فيروز "بعدك على بالي..."----


- عملالي بلوك يا ندى؟ أحا! بفكر أشتمك!
- مضايقاك قوي كده ليه؟؟
- معرفش، مش مهم ابقى عارف، أحا بكرهك فشخ!!
- انت متضايق عشان معندكش أي فكرة قد ايه كانت بتضايقني لمّا أكلمك ومتردش أو تقفل في وشي! أو اشوفنا اونلاين طول الوقت وأبدًا حتى منسلمش!
- برضه أحه. أحا! .... بحبك!!
          ----في الخلفية بصوت كراوية "وأول الألوان قراري إني أبيعك وأشتريني"----



هي أم كلثوم في "جددت حبك ليه" كانت بتكلمه هو شخصيا ولّا بتكلم قلبها في الأساس؟!
طول عمري كنت بأسمعها بتكلمه بس النهار ده بأسمعها من "بريسبكتيف" جديد تماما.. 



بنت على تويتر معرفهاش، غالبا اسمها مي، وغالبا بنت.. بتقول كلام قريب، قريب لدرجة تخض!
ساعات بأحسها عايشة في أوضة جوه دماغي .. بأحسها بتحسّني، توحشني، وتطبطب عليّ.. وساعات، بأطبّق عليها نظرية "سها" إنو أرواحنا لمّا كانت ساكنة في عالم تاني غير بتاعنا ده كنّا أكيد قططتين صحاب أو إخوات أو حاجة كده. لو شفت البنت دي ع الحقيقة هأحضنها حضن يقول لها الكلام ده .. يارب ماقابلها أبدا!! بس يارب أروح العالم التاني بتاع القطط وساعتها احضنها عادي..

أنا عندي روح واحدة لكن بميت روح، قدراتها خارقة وعاشت في عوالم كتير. مؤخرًا بتبقى نايمة معايا في السرير وقاعدة في نفس التوقيت في أوضة صغيرة قدام لابتوب بينك في مكتبة كبيرة في ألمانيا.. آه يا ألمانيا!
----في الخلفية بصوت الجاسمي "التخين":  وكإن الوقت فِ بُعدك واقف مابيمشيش، وكإنك كنتِ معايا بعدتي ومابعدتيش... بأحبك وحشتيني----




يوم ما رحت أقابل نشوة الحوفي في مكتبها اديتها الوش اللي بيطلع غصب عنّي كل مرة أدخل فيها "المصري اليوم"، مع اني بأكون ضرباه بالجزم قبلها علشان مايطلعش!
ليه مواعيدي مع المصري اليوم زادت كده؟! ورسايلك زادت يارب وعقلي محدود وقلبي ضعيف!!

وفي يوم كنت ناسية أنا أصلا رايحة ليه بس فضلت مكملة مشي في شارع القصر العيني على رجلي رغم ان الجدار اتهّد، وفضلت أدعي أي حاجة تحصل تحل الموقف قبل ما اقف قدام الريسيبشن.. فعلا حاجة بتحصل، حاجة حلوة، شكرًا يارب! إنت أجمل حاجة في كل الحاجات.
    ----في الخلفية صوت أمي بتحكيلي آخر مكالمة مع طنطي ماجدة أو تيتة سمرة أو فاطمة عبد الرحمن----

أفلس ثم أستلف 100 جنيه من إيجار الشهر الجاي ثم أخرج من الأستوديو أعدّي الشارع وأركب تاكسي ثم بعد 5 دقايق استغربني واسألني ايه اللي هببتيه ده؟ تاكسي وانتِ معاكيش غير 100 جنيه مش عارفة لحد امتى حتى؟! وأصلا سلفاهم!!...
ثم أوصل وهناك اقابل أيمن الصيّاد ويقول لي: "ما هو خارج القاعدة دائمًا أولى بالإتّباع".

وكتب الكتاب ما هو إلّا ورقة مضى وبصم عليها شوية ناس. بس!
     ----في الخلفية صوت سالي في مونولوج بُصّي وهي بتبص لكل اتنين حبيبة: "فرحانين على ايه؟! هتتفشخوا! جتكوا القرف!"----

"ممكن تسّكتي بنت الوسخة دي؟" قالها مشيرًا إلي كاميليا جبران، وسكتّها ومازعلتش إنه شتمها!!
(يخرب بيت الحُب اللي حبيته لك)

وفي حركة مفاجأة تقدم ببوسة رزع في الدماغ وقال لي "شكرًا إنك هنا"
                       ----في الخلفية مزيكا فيلم إيميلي----
----في خلفية أبعد "انتِ فاكرة نفسك مين؟!  انتِ آخرك واحدة من عشيقاته!!" بأداء إسعاد يونس في "يعقوبيان"----

لمّا أسرح في التاكسي وأفوّت شارع بيتنا بمحطة ونُص .. أعترف اني مش كويسة!

إكتئاب يوم (1):
يوسف طلب أكل ليّ وليه وعزمني رغم انه كان أكل أصلا، طلب أكل مش بيحبه عشان عارف انه هيبسطني وبعد ما خلّصنا قال لي : "شكرا يا ندى ع الأكلة الحلوة دي!"
إكتئاب يوم (2):
رغدة: "أي كائن فيه روح لا يمكن ميفرحش لمّا يشوفك فرحانة .. سعادتك بتهب ع الآخرين .. كوني سعيدة دائما!! واعطينا شرف تناول الغدا عندك في مرزوق دائما!"
إكتئاب يوم (3):
مخلوف: "انتِ دايما بتصدّري البهجة فحاولي تخلّي بالك من نفسك!"
                  ----في الخلفية بصوت زياد "لكن شو بأعملك إذا اجتمعوا فيّ كل الإشيا الكافرين؟"----

رغم اننا مبطّلين نلعب بابا وبنته بقالنا كتير، كتير، لكن لسة بحس شادي سادات جزء لا يتجزأ من ضهري.
قال لي بعد مكالمة دموع طويلة: "لأ، لسه شوية حاجات كمان علشان تحسي انها قفّلت، انتِ أجمد من كده يا ثاقب! والله!"

لمّا تحكي مع صديق أردني/فلسطيني عايش مؤخرا بين مصر والسعودية ماشفتوش من سنين عن حلم عربي وتدمع من التأثر فيقول "ندى -كام اون- بلا كلام في السياسة إحكيلي شو أخبارك" فنتكلم تاني في السياسة.. ونطلب بيتزا تيك أواي من ترومبيتا وندفع تمنها ونمشي وننسى ناخدها..

- صوتك مش حلو، حصل ايه؟
- في التليفون؟
- إنتَ فين؟
- بين وسط البلد والزمالك
- طب ياللا زمالك؟
- أنا مش عايز أقابلك ولا إنتِ ع فكرة
-طيب، خليك حلو لحد ما أعرف اشوفك وخلّي بالك من....و.....
         ----صوت إلهام في الخلفية "يا اختي إنصحي نفسك!"----

شادي نجيب اتصل بيّ صحّاني بعد إمتحان الفرنساوي قال لي "أنا عملت حلو، ياللا روحي كمّلي نوم!" ولمّا قابلته أول مرة بعد ما خلّص إمتحاناته لقيته لابس في ايده التوكة الزرقا السلك بتاعتي اللي اخدها منّي من شهور.. يا ترى أختها البمبي فين دلوقت؟!

- ماتوعدنيش أرجوك!!
- مش بأوعد بحاجة كبيرة.. قهوة!
- في كل الأحوال هو وعد مافيش فرق.


"أنا أول ساعة في اليوم مش بأحب اتكلم. بأحب اسكت وانبسط بحاجات الصبح"


- بطلّي غواية أو كمّلي للآخر!
- للآخر حتى لو ملهاش آخر؟
- أنا دايما حاضر في لعبة الغواية، مشكلتي مع مسئوليات اللعبة... أو، مش عارف
- أو مش عارف.


كل الحفلات الغنائية المهمة اللي حصلت في مصر حضرناها سوا بنفس الحماس رغم اننا ماكناش نعرف بعض، زياد رحباني، سعاد ماسي، خالد ومنير، ريما خشيش، لينا شماميان وأول ظهور لمشروع ليلى .. فلمّا عرفنا بعض، عرفناها كويس، كان ده سبب عدم حضوري مشروع ليلى2.
         ----في الخلفية صوته بيزن "جبتيلي ايه من ألمانيا؟!" "طب فين صور الحوار بتاعي؟!"----

- لون أوضة المستشفى الأبيض صعب قوي يا مصطفى وبيتعب، كل حاجة بيضا عن قصد كده، بشكل يفكرك انك مريض كل ثانية
- بس انتِ أصلا بتحبي اللون الأبيض مشكلتك مع الأوضة مش في اللون، في اللمبات، أيوة النور هو المشكلة مش اللون!
- طب قول لي حاجة فيّ حلوة، محتاجة طاقة إيجابية!
- حالا لأ، هافكر وابقى اقولك
- :(
- بتحبي شغلك، ومنظمة
- يا سلام! حاجة خاصة عن كده! يا نجيب ده انت أقرب صحابي ع الكوكب وحافظني..
- هافكر وابقى اقولك!
"صحيت م النوم أدور ع الساعة في الأوضة علشان أروح أصلحها ملقتهاش، وبعدين افتكرت انك قفشتي وطلعتي اخدتيها وهي بايظة لسه"
مش غريب أبدا استمرار قصة الساعة بينا كل السنين دي ولسه، أعظم خلافنا في الأساس هو "الوقت"!

لوبي هيلتون رمسيس الساعة 7 إلا ربع، ليه ماسألتش على صورة لعبدالله ولّا دوّرت عليه على فيس بوك بدل ما ببحلق في الناس كده!! يا ترى العلبة قد ايه؟ طب فيها ايه؟!
كان أول أطول أصعب عصير برتقال أشربه معاه..
أنا الوحيدة ف مصر دلوقت اللي عندي "مج نيكون لينس" عشان أنا بس اللي عندي صاحب جميل أصيل عايش في دبي أسمه جهاد.

----صوت غدير في الخلفية "مش عايزاكي تزعلي .. هو عنده هسهس وبيخاف م الحسد .. معلش انك شيلتي صورتنا من البيدج بتاعتك"----

بفرّج إلهام على صور سيشن الواد المزيكاتي اللي صوّرته، لقيتها بتسألني "ايه ده هو مغير كذا لبس إزاي ... أخ نسيت أن (عندنا) مكان تغيير لبس في مرزوق".
هيّ أكتر شخصية مش شبهي، على طول بنختلف بس بنلاقي بعض في الشغل، بنتفق، لكن ده ايه علاقته باننا نقابل أشخاص شبه بعض ويتصرفوا معانا بنفس الطريقة ونرد عليهم نفس الردود ويفشخونا بإستخدام نفس الأدوات في نفس التوقيت فنحس نفس الإحساس ونحكي، قصدي نسّمع، بعدها لبعض ونضحك؟!
----             في الخلفية بصوت ثومة "كنت بشتقلك وأنا وأنت هنا .. بيني وبينك خطوتين"----


"لأ الصور دول مش حلوين أنا طالع تخين"
"طب حاولي تضغطيه بفوتوشوب ترّفعيه يا ندى"
"ندى، انتِ عايشة في مصر مينفعش تتعاملي بقوانين أمريكا"
"بُصي لازم تستحملي وساختهم لحد ما الأستوديو بتاعك يبقى ليه اسم في الوسط وساعتها ابقي اتّنكي عليهم براحتك"
         ----صوتي في الخلفية: علّقي يافطة على باب مرزوق" نحن لا نصوّر ولاد الوسخة!"----

"...إنما تعبتي وهتديهم الصور من غير فلوس ده اسمه عبط" عمو سليم/ الزمالك/ منتصف الليل
سليم "رغم كآبته" من أهم مصادر إنشكاحي في الحياة. كتير بحس إني عايزة أفتح دماغه وأرمي كل نظرياته المأساوية في الزبالة وأحط مكانها موز وعنب بس. طول الوقت عايزة أشكره على حاجات مابعرفش أشرحها ف بخاف يسألني "على ايه" فبأسكت وأشكره في سرّي.
                  ----صوت سليم في الخلفية "هاجيبهولك في شوال يا ندى! شاوري بس علّي يزعلك!"----



لمّا بتحزن بتروح الزمالك .. بتحب عصابة الزمالك .. مابتحسبش الوقت اللي بيعدي هناك .. اليوم اللي بيخلص في الزمالك، مابيخلص...


سها بتسوق بالساعات علشان تجيلي الزمالك تحضنني .. تحضنني بس وتمشي .. سها مش بتعرف تشوفني حزينة .. سها ما كانت صاحبتي وأصلا، أنا معرفهاش، بس حافظاها، صم!
"لمّا شفتك بتحضني يحيى وهو ماشي وبتشكريه، حسدته.. فيكي حنية غريبة يا ندى!"

نيرفانا دخلت أونلاين تدور على ألوان الطيف علشان تعمل لي حظاظة بألوانهم تليق عليّ وع الألوان اللي بألبسها. خلتها تربطها الرابطة المتينة عشان ماعرفش أفكها من إيدي.

ومن ساعتها وهو واحشني! ع طول واحشني حتى لمّا بينزل إجازات!
آخر مرة قعدته قدامي وقلت له أنا مش هاتكلم هأركز بس أخد لك "مينتال بيكتشر" علشان تفضل معاي لمّا تمشي، ضحك عليّ قوي من قلبه فبقى عند دماغي مش بس صورة حية لأ كمان بتضحك.
                          ----في الخلفية صوت سكوت كريم----
 

 
الفيلم خلص ونزلت التترات وأنا لسه مابعرفش أعمل قهوة!!
    ----في الخلفية قرآن كريم بصوت العفاسي "غير المغضوب عليهم ولا الضاليين"----

نسألكم الدعاء!

قاتل الأشياء بفعلها!

بتحب حد ومش هتقول عشان كرامتك؟ طب بعدتوا ووحشك جدا بس مش هتقول عشان ماتبانش ضعيف؟
مين اللي قرر ان البُعد خصام؟؟ مين فهمنا ان حسابات الحُب داخل فيها كرامة؟؟!
خايفيين تبانوا ضعاف، وكده انتوا اقويا بقى؟ ما فيش أضعف من بني آدم حاسس حاجة وخانقاه ومش عارف يعبّر عنها!

روح ارمي اللى جواك عندهم حتى لو هما مايستهلوش! طز فيهم، انت تستاهل ومشاعرك تستاهل مش مهم هيفهموها إزاى المهم انت ترتاح.
لمّا عباس العبد قال: لا تقاتل الأشياء بمقاومتها لأنها ستعود وترد إليك الضربة بوحشية، قاتل الأشياء بفعلها حتى تفقد معناها!
ساعتها مافهمتش كلامه أوي لكن فهمته لمّا جرّبته..

مثال بسيط حصل النهار دا الصبح، الحقيقة هو حصل من فترة أبعد من كده بكتير..
دخل حياتي في مصادفات لطيفة، كان بيننا رغي قيّم وكلمتين حلوين (أيوة أقصد عدد 2 كلمة) وهما كفيلتان بدغدغة وكهربة سلوكي العاطفية حتى الآن..
تجربة لم تكتمل واضح من استخدامي أفعال ماضية "وهذا لا يعنيني ع الإطلاق" مافيش حياة كاملة عشان هينقصها متعة استكمالها .. مش مهم تكمل، المتعة في التجربة. تقديري واحترامي للإحساس اللى عشته جوه التجربة بيخليني اتوحّش هذا الإحساس...

حلمت بهذا الرجل من شوية وصحيت ماعرفت اكمل نوم .. صحيت سعيدة رغم ان ملامح الحلم لم تكتمل ورغم ان صورته في الواقع فيها الكثير من الرتوش والكسور المؤلمة.. بس أنا مبتسمة!! إزاي كده؟! شيزوفرينيا؟
لأ، أنا بغض النظر عن الطرف التاني أو ظروف الموقف، مشاعري كانت/لازالت صادقة فطبيعي تفضل تبسطني حتى في وقت الألم. بس.
كتبتله فورا اني حلمت بيه واني مبسوطة، ومن جوه جوايا مستنتش رد. ايه رد ممكن يبقى أبلغ م الإحساس اللى عشته أنا في لحظة التفريغ دي؟! أنا مرتاحة دلوقت .. كأني كنت بجري في الحر كتير ودلوقت اخدت دش ساقع وقاعدة باكل عنب واسمع فيروز في التكييف.
مش يمكن لو مردش أو رد بسخافة تضايق منه أو تكرهه فيبطّل يوحشك وتبقى الحمد لله خفيت؟ مش يمكن تحس بعد ما طلعتها إنها أتفه ما انت كنت متخيلها لمّا كانت مستخبية جواك، طبيعي تقديرك للحاجات اللي مش شايفها قابل للخطأ. ويمكن يرد بلطافة فتتبسطوا بغض النظر عن ايه هيحصل بعد فسوة من الموقف المهم اتبسطوا وانتوا جواه!

حسيت حاجة هاحترمها وهتعامل معاها وهعيشها للآخر حتى لو ملهاش آخر.
هيّ الناس كده بتروح وتيجي وإحساسك بيهم كمان بيروح ويجي .. ماتنكرش انك رسمت أحلام مع/عن ناس زمان متعرفش حاجة عنهم دلوقت، ولو ذاكرتك ضعيفة شوية احتمال متفتكرش أساميهم حتى وبتضحك من جواك ع الأحلام دي ماتنكرش شايفاك!!
الفرق بين زمان ودلوقت انك زمان تعاملت مع الأشياء ببساطة وواجهت ببرائة من غير حسابات كرامة وضعف فاكتشفت الحاجات على حقيقتها فراحت في سلام ولمّا بتفتكرها بتضحك مش بتعيط! لكن دلوقت انت أضعف من انك تواجه متكلمنيش عن ضعف تاني بقى!

7-6-2012
6:40 am.

مرزوق

فى يوم ٥\٥\٢٠١٠ على محطة أتوبيس الدقى قدام كليتى بحضور "نور فتحى" صاحبتى المصورة الشاطرة، حلمت يكون عندى مكان يحمل أسم جدى ثاقب "رحمة الله عليه" بالخير، يقدم نشاطات فنية ثقافية إجتماعية مختلفة تقوم جمعيا على التصوير أو يكون التصوير جزء مهم فيها ع الأقل، واشتريت كشكول سلك برتقالى اللون وسجلت فيه الحلم بالتاريخ. وعدْت نفسى ان فى خلال سنة أكون أخدت خطوة إيجابية أولى فى المشروع، فكانت سنة الثورة... 

يوم ١٠\٣\٢٠١٢ مضيت عقد مرزوق، واستلمته بالحالة اللى فى الصور اليمنى.
و يوم ٩\٥\٢٠١٢ كان ده شكله فى الصور اليسرى.

مرزوق هو الأسم الحركى لأستوديو ثاقب "الأول" وأحيانا يطلق عليه بعض الرفاق الطيبون لقب "دكانة ثاقب" بحكم أن المكان فى الدور الأرضى وبابه حديد جرار.

أحب اعترف بالمناسبة ان حساباتى المنطقية فى هذا الحلم لا تتعدى ال15% .. آخر فلوس تحويش حقيقية ملموسة اتدفعت مقدما فى إيجار الشهر ده وأنا مصورة حرة ليس لدى دخل ثابت من أى جهة. لكن، هم إحساسى ومعتقداتى الروحانية بيقولوا ان هيجى شغل وناس وحاجات تتصور فى مرزوق وهيجيب إيجار الشهر الجاى وهعمل بوست زى دى السنة الجاية "أو اللى بعدها لو قامت ثورة تانى" احكيلكوا فيها عن تطورات المشروع إن شاء الله.

- The girl in the photos is my life time model, my assistant, partner and sis Nesma Thakeb.

 - Gehad Salah my dear traveler friend is the one who gave the studio the name Marzou2 and this is his first time to see it.  

طريقة عمل البنورة المسحورة

عمرى ما عرفت أعد قلبى فيه كام أوضة ودايما كنت بقّسم الناس فيهم بالشبه، بس الأوض السينجل حافظاهم زى اسمى...  

أنا اتحضنت امبارح فى أوضة سينجل، ضيقة جدا على قد الحضن بالظبط، مفيهاش مكان لروح زيادة بعدنا إحنا التلاتة -أنا وانت والحضن-، اتنفست كل لحظة فى الحضن كأنه الأخير ونمت فيه، صحيت لقيت الأوضة ضلمة فمعرفتش أشوفك، خرجت منها باجرى عشان بخاف من الضلمة... 

الأصل فى كل أوض القلب الضلمة، الأصل انك متشفش وانت جوه، الأصل انك تحس.
 
خطوط الوصل بين البنى آدمين اللى عايشين فى الأوض وبينى هى مصدر النورالوحيد، النور اللى بيشغل البنورة المسحورة فأشفهم صور بتتحرك فيها. أول ما خط يتقطع البنورة تعطل واحس الضلمة ألاقينى باجرى أدور على سلوك الكهربا .. باجرى عشان الدنيا بتجرى، الدنيا بتجرى فى الواقع لكن أنا باجرى فى الفراغ هقع؟ الوقعة فى الفراغ هتوجعنى؟ أكيد لأ ده فراغ الجرى فيه مجرد تضيع وقت ومجهود .. محدش أصلا بيحس انه وقع إلا لو اتخبط وانا هتخبط فى ايه فى الفراغ؟

أنا عارفة كويس ان سلوك الكهربا مش هتنور مهما جريت ولو نورت هشوف بس مش هحس ورغم كدة مبطلتش جرى!
الحقيقة أنى باجرى من الألم .. أيوة فى ألم ووجع فى الفراغ ألم نفسى تأثيرة أقوى من أجدعها خبطة، عشان الفراغ رغم فراغه إلا انه أكيد له تقييم...

أنا مش ضامناك فى اللى جاى، ومش قلقانة لسّة عايشة بْحِس حضنك الأخير. وانت إفضل نايم فى سريرك فى أوضتك مقفول عليك معاك مفتاحها، لو صحيت ووجعتك الضلمة هتلاقينى برة فى الريسبشن تعالى وأنا احضنك تانى وهصدق تانى انه الأخير!

 لوشفت صورة فى البنورة ومفهمتهاش، مش هنور النور هغمض عينى واحسها! مش لازم كل حاجة نشوفها مش لازم!!
 

أول مرة أكتب من بيتى الجديد "مرزوق" :)

My own Fall

The calendar says we're officially in the spring, but today on my way walking from Mohandseen to Dokki with Halim on the radio and you on my mind, the trees had another point of  view.

ThakebPhotography

فراشة فى القلب

ليون - فبراير 2010

-عقدة طفولة مثلا؟

-لأ مش فاكرة حاجة حصلتلى زمان فى الضلمة..
-وراثة؟ فى حد فى عيلتك كدة؟ 

-يمكن، أمى مش بتحبها
-مش بتحبها غير بتخاف منها!
-مش متأكدة..


-كل البنات بتحب الفراشات، أنا عارف انك مش زى كل البنات، بس الحقيقة ان الفراشة هى أكتر حاجة شبهك أنا بعرف أرسمها...
-كلامك حلو، ده غير ان تكتيفتى فى سرير صغير فى مستشفى كبيرة فى بلد غريبة ليلة إنتظار دخولى أوضة العمليات الصبح بيزود تأثير كلام ممكن فى وقت عادى يبقى مجرد كلام...


-لمّا نرجع مصر نبنى بيت صغير وأرسملك فراشات كتير ملونة على كل الحيطان.
-ولو مرجعتش؟ ولو ملحقناش نبنيه؟
- ولو بنينا ورسمنا و جه زلزال هد البيت؟ ولو حاجة اتدلقت عل الحيطة وضيعت الرسومات؟ ولو الدهان قشّر ووقع؟
كلها افتراضات ومفيش ضمانات!
لكن عارفة ايه الضمان الوحيد بالنسبة لى؟ انى أرسم الفراشة جوه قلبك!
هرسمها صاحية وكل ما تتنفسى ترفرف وتخبط فيكى فتفكرك بيّا .. وكل ما قلبك يضعف ويفكر يستسلم للألم ترفرف فتصحيه وتشجعه يكمل!


-هى ليه شبهى؟
-صغيرة وضعيفة لكن منطلقة ومحدش بيعرف يوقفها
أى خبطة ممكن توقعها تموتها لكن ولا بيهمها مبتخافش ومبتبطلش!
عريانة بس متغطية .. متغطية بالألوان
عمرك شفتى فراشة بتلعب فى الضلمة؟ لو دخلت بيتك فراشة فى الليل هتلاقيها بتطير فى حدود اللمبة النيون فى السقف أو تيجى تلزق على شاشة الكمبيوتر لو طفيتى نور الأوضة..
وعشان كدة انتى بتخافى من الضلمة، متتكسفيش تانى من خوفك! خوفك من الضلمة حياة!

سنصير يوما ما نريد!

هى برج العذراء اللى عمر ما كان فيه بينه وبين برجى القوس أى كيمياء لكن سبحان الله هى شريكة أيام الشقى فى بلاط صاحبة الجلاجة
هى:
كل يوم صحينا فيه الفجر واتقابلنا فى أول أو تانى رحلة مترو بالكتير عشان نسافر نعمل تحقيق صحفى؛ بنات لوحدنا من غير ما نستنى حد يجى معانا يسندنا ومن غير ما نكون متأكدين مين هيرضى ينشرلنا أصلا!
بنستمتع بإكتشاف الأماكن البعيدة والبنى آدمين اللى عايشين برة الدايرة الضيقة فى القاهرة .. نلف ونتوه ونتخبط وناكل ونعرف ناس جديدة ويتنصب علينا ونتخانق معاهم ومع بعض ونرجع متاخرين  ويضايقوا فى البيت ونوعدهم المرة الجاية هنرجع بدرى ونسافر تانى لوحدنا تانى ونتأخر تانى!
منلقيش حد عدل ينشر شغلنا على مزاجنا فنقرر نخبى حكايتنا فى الدرج حتى إشعار آخر أكثر احتراما وتقديرا لمجهودنا...

كل مرة كان عندنا معاد فى الأهرام أوالأخبار الساعة واحدة، فنتفق نتقابل فى مترو جمال عبد الناصر واحدة إلاربع عشان أنا بتوه لوحدى .. اتأخر عليها فتتصل تأخر معادنا وهىّ مضايقة منّى وبعدين تقابل أمال عويضة صدفة وهىّ مستنيانى فتفرح ومتبقاش مضايقة منّى .. بعد الشغل ننزل عشان نركب ميكروباص ميدان لبنان اللى بيقف قدام الأهرام بالظبط وبينزلنا قدام وشوشة بالظبط، أشدها من ايدها وأقولها من شغل لشغل على طول كدة؟ تعالى نروح لهاشم ميريت .. نتمشى من إسعاف لميريت وفى الطريق ناكل ونقابل ناس حلوة صدفة ونحكى ونضحك وندخل ميريت فتتخض هىّ من الكلبة بتاعة هاشم وتبعد وأنا أضحك وأسلم عليها والاعبها لحد ما هاشم يدخلها أوضة بعيدة، شوية وتبدأ تكح من دخان السجاير الكتير عشان عندها حساسية فنمشى..

كل مرة أكلنا فى كافتريا نقابة الصحفيين وحكينا كتير هناك عن القانون ابن الجزمة اللى مخلّى أمثالنا لسّة مش أعضاء نقابة عشان الترخيص الأجنبى..

كل الأصحاب الحلوين اللى عرفناهم سوا من حوارات عملناها معاهم.
كل مرة خرجنا فيها من حوار بنشتم نفس الشتيمة فى المصدر فى نفس واحد.
كل مرة قعدنا فيها عند أسامة نقاوح عشان يختار الصور اللى احنا عايزنها فى الرسم.
كل مرة قعدنا فيها على أيد مختار وهو بيرسم الصفحة عشان ميبوظش الخطة اللى احنا حطنيها.
كل مرة دخلنا فيها لفاروق نقاوح عشان الفلوس.
كل مرة بدلنا فيها كتب.
كل مرة كلنا فيها مصاصات سوا.
كل مرة اتريقنا فيها على "صحفيين السبوبة" و "رؤساء التحرير القلل".

وكل مرة حلمنا فيها حلم لسة مخرجش من الدرج...
مفيش أمتع من شغل بتعمله بحب مع ناس فاهماك وبتحبك!

إلهام الجمّال، بحبك وشكرا وسنصير يوما ما نريد إن شاء الله!

A cute photographer from Al-Ahram took this photo while we were interviewing him :)